Was gits neus ?


10.Juli

Juhuii sie isch endlich da...eusi neui CD "querbeet". Zerscht e mal vile Dank allne wo die CD ermöglichet hend und wo a de CD-Taufi vom letschte Samschtig debii gsi sind und eus eso fescht unterstütz hend. Viele viele Dank !

 

Ab sofort chan eusi neui CD bschtellt werde und natürlich chönd Ihr uf folgendem Link scho mal chli drilosä.

https://www.youtube.com/watch?v=BgcECLQcKaU

 

Ez hoffemer natürlich das eu allne die CD gfallt und hoffet das die ez ufe und abelauft, bi eu im Auto, Dehei, im Stall oder im Schlafzimmer. Chunnt eigentlich gar nöd drufa wo sie lauft, hautpsach Ihr loset Sie vom Morge früeh bis am Abig schpaat. I dem Sinn wünschemer eu e gueti Zyt und bis hoffentlich scho ganz bald wieder irgendwo und namal Danke vilmal für d`Unterstützig.

 


4.Juni 2018

Ihr hend richtig gseh...so wird Sie usgseh eusi neui CD "querbeet" .

Erhältlich wird Sie ab em Samschtig 7.Juli 2018. Will mer Sie au a dem Tag taufet. Das machet mer a de "Schönenberger-Chilbi" uf em Dorfhuusplatz im Festzelt in Schönenberg. Würd eus natürlich freue wemer de eint oder anderi würdet gseh und Ihr au a euser CD-Taufe debii wäret.

 

Eusi CD "querbeet" isch wie de Name scho seit, e abwechsligsrichi CD worde mit verschiedene Stilrichtige quer dur alles durä. Drum "querbeet"

Näbet em neue Lied "Am Morge am 2" de Fortsetzig vo eusem "Fäscht-Lied" womer immer "Eis hämmer immer na gno" gsunge hend, singemer etze" Am Morge am 2, han i eich welle Hei".Natürlich hemer na meh Lieder uf de CD und so ghört mer i de Medley uf eimal Lieder us de 70 & 80 er Jahre oder im "Oberkrainer-Medley" Musik us Österreich. Zudem Hemers nöd unterlaa, au chli um d`Wält z`gha mit de Musig. So ghört mer im Medley "querbeet" Musig us aller Welt und im Titel "Piraten oho" öppis womer au nöd Alltag ghört. Natürlich dörf au urchigi Ländlermusik nöd fähle. Zu derä simmer vom "Nötzli mit dä Chlötzli" a de Chlefeli und em "Urs Moser" wo bödelät na chräftig unterstützt worde. Das em mal en chline Usschnitt und e Vorschau vo eusne neue Titel. Selbstverständlich wärdet er bald die eint oder ander Kostprob devo übercho. Mir freuet eus die CD chönne vorzstellä und hettet natürlich Freud, wemer am eint oder andere au e "CD" dörfet schicke, das wird denn natürlich under anderem au wieder über die Sitä möglich sii. Uf jede Fäll wünschemer eu scho mal e gueti Zyt und natürlich nur s`bescht und bis hoffentlich ganz bald.


26.April 2018

So entli meldet mir eus wieder mal und das mit ganz guete Neuigkeite. Mir nämet zur Zyt gat eusi zweiti CD uf. Und sind scho sit längerem flissig am ufnä im Tonstudio.

Wie CD heisse wird, wenn Sie usechunnt und wenn d` CD-Taufe isch erfahret Ihr natürlich bald uf derä Site. Mir haltet eu natürlich uf em laufendä. Freuet eus eu bald eusi zweiti CD chönne z`präsentierä und chönd eu scho mal versprechä das ihr sehr gspannt druf dörfet sii. Uf vili neui Sache und Idee womer zur Zyt im Studio am verwürklichä sind. Zum eu allne en chline Iblick i das ganze z`ghä, gfindet Ihr s`eint oder ander Bild zum aluegä.

Bis bald und wie gseit, bald erfahret er meh über euses neue grosse Projekt "CD 2".


5.Februar 2018

So mir hoffet Ihr sind alli guet is neue Jahr 2018 gstartet. Mir hend bereits die erschte Uftritt hinder eus und sind guet im neue Jahr acho. Mir werdet eu i dem Jahr mit ere grosse "Überaschig" überasche.

 Haltet eu natürli selbstverständlich uf em laufende. Eusi nächschti Uftritt hemer Afang März im Dukes in Sihlbrugg. Wenn er also wieder mal amene Dunschtig-Abig in Usgang wend, wer das e gueti Glägeheit dezue. Mir würet eus freue de eint oder anderi vo eu z`gseh und wünschet eu wiiterhin e gueti Zyt und machet kei Seich. Wie mir :)


12.Dezember 2017

Wie warschindlich au bemerkt hend, isch es dusse nöd nur chelter sondern au so richtig wiis worde. Es gat also nüme lang bis Wienacht isch. A dere Stelle wettemer eus ganz herzlich bi eu allne für d`Unterstützig im vergangene Jahr bedanke. Schön das mir au das Jahr hend wieder chönne uf eu zelle. Mir freuet eus jetzt scho uf die nächste Uftritt im neue Jahr. Bevors aber sowiit isch simmer na in Hütte a de Autocrossbar und z`Schöneberg am Wiehanchtsmärt. Vilicht gsemer de eint oder ander na im alte Jahr und suscht freuemer eus jetzt scho das mer dich im neue Jahr wieder gsend. Uf jede Fall allne e schöni Wiehnacht un den guete Start is neue Jahr 2018. Bis denn, machet kei Seich und blibet aständig :) 


20.September 2017

Scho gmerkt ? Am Morge langets nüme wemer ohni Jacke zum Huus us gat. Genau, mir sind inzwüsche scho wieder im Herbscht acho. Wo eus de eint oder anderi schöni Uftritt erwartet. Als erschts schpilemer am Fritig 6.Oktober a de Vehustellig im Hirzel. Und mir hend Glück mir dörfet d`Lüüt dete im gheizte Festzelt unterhalte. Im November gats wiiter mit Uftritt am Fondue Abig in Wädenswil i de Freizytalag und amene Uftritt am Cheese Festival in Rapperswil. Ebenfalls dörfemer au das Jahr am Turner-Chränzli in Samstagere und am Wiehnachtsmärt in Schöneberg debii sii. Ihr gsend eus erwartet na s`eint oder anderi das Jahr. Nebet bii simmer sehr vil am üebe und werdet eu bald mit Neuigkeite überasche dörfe. Selbstverständlich erfahret Ihr die uf eusere Internetsite. Jetzt wünschemer en schöne goldene Herbscht wiemer so schön seit und hoffet das mer de eint oder anderi a eine vo eusne nächste Uftritt dörfet bergrüesse. Bis bald.


10.März 2017

Und scho simmer wieder im neue Jahr acho und lönd scho langsam de Winter hinder eus. MIt Betonig uf "langsam" das ja na nöd sälte amig namal abegschneit hett. Mir hend scho die erschte Uftritt vo dem Jahr hinder eus. Und freuet eus uf wiiteri Uftritt zum Bischpil am Ländlerabig im Restaurant Bahnhof in Steckborn oder am Regional-Turnfest wo das Jahr in Schöneberg statt findet. E Wuche druf dörfemer am Jubiläums-Ländlersunntig im Restaurant Johaniter im Niederdorf in Zürich uftrete. Freuet eus uf jede Fall uf alli wiitere Uftritt und hend au musikalisch die eint oder ander Überaschig für eu, hend d`Zyt dur de Winter chli gnutzt zum s`eint oder ander neu izstudiere. Suscht wer`s eus ja langwilig worde. Wür eus freue de eint oder ander a eine vo eusnä nächste Uftritt chönne z`begrüesse und wünschet eus bis denn en guete Start in "Früehlig". 


13.Dezember 2016

Und au das Jahr 2016 gat aber so langsam aber sicher gege s`Endi zue. Drum wettemer eu allne jetzt scho e schöni Wiehnacht und en guete Start is neue Jahr 2017 wünsche. Denn wemer s`au nöd unterlaa eu allne danke z`säge. Seget das Veranstalter, Verein, Zuehöhrer und all wo eus au das Jahr unterstützt hend und Freud hend a dem wo mir machet. Freuet eus jetzt scho ufs neue Jahr und alli Uftritt womer dörfet ha. Bis denn eu allne e gueti Zyt und mir hoffet mir gsend eu scho bald wieder e mal :)


18.Oktober 2016

Und scho simmer im Herbscht a cho. Merkemer vorallem da dra, das mer scho ame Oktoberfäscht und anere Vehustellig hend chönne schpiele. Etze fanget defür wieder d`Chränzli und sch gli d`Fasnacht wieder a. Freuet eus das mer a de Chesslätä z`Morschach und am Turnerchränzli in Samstagere dörfet go schpiele bevor denn im Dezember de Wiehnachtsmärt vor de Tür staht.Mir freuet eus uf die nächschte Uftritt und hoffet das mer de eini oder anderi vo eu atreffe chönd. Wünschet e gueti Zyt und hoffe mer chönd na paar schöni Herbschttäg mit vil Sunne gnüsse.


12.Juli 2016

So mir sind zmitzt im Summer a cho, au wenn`s mängisch nach em vilne Räge, nöd eso usgset :) Uf jede Fall hemer grad de Uftritt vom Sängerfest im Hirzel hinder eus. Am 1.August startemer denn mit wiitere Uftritt. Am Morge simmer am Brunch in Lufingen bi Klote und am Namittag a de 1.August-Feier i de Frohmatt in Wädenswil. E Wuche druf am Samschtig 6.August dörfemer am "Chäfer-Fäscht" in Rain im Kanton Luzern go Musig mache. Dete schpilemer ab em 9ni i de Kafistube. Zwei Wuche schpöter am Samschtig 20.August schpilemer denn am Summerfest im Dukes in Sihlbrugg, bevor wieder e Wuche schpöter am Sunntig 25.August de Uftritt a de Chilbi in Oberrieden uf em Programm staht. Im September chönder eus denn am "Dorf-Fäscht" in Horge und am "Oktoberfest" in Wädenswil ghöre. Die gnaue Date zu allne Uftritt gfindet ihr wie immer uf Agena. Mir haltet eu uf em laufende und wünschet allne en schöne Summer :)


17.Februar 2016

Au mir hend d`Fasnacht guet überstande. Und weret scho langsam parat für de Früehlig :) Aber lömer demm nachli Zyt, de chunnt denn scho zur richtige Zyt !

Freuet eus uf jede Fall mal uf eusi nächschte Uftritt. Am Fritig 26.Februar dörfemer i de Ostschwiiz go Musig mache. Und zwar schpilemer dete im Restaurant Bahnhof in Steckborn. E Wuche druf am Samschtig 5.März dörfemer am Strickhoffball in Eschlikon für gueti Stimmig i de Kafistube sorge. En guete Monet schpöter am Samschtig 2.April simmer denn am Jodler-Chränzli im Hirzel nach em offizielle Programm im Isatz und hoffet das mer alli Bsuecher nach em offizielle Teil nöd grad devo jaget. Bis jetzt hämer emel immer Glück gha. Würet eus uf de eint oder ander Zuhörer natürlich sehr freue und wünschet eu allne e gueti Zyt und ebe bis badl !


23.Dezember 2015

Unglaublich aber aber wahr, scho staht d`Weihnacht und s`neue Jahr 2016  vor de Tür. Am Wetter a, würdmer aber ehner denke das mer bald wieder i de Gartewirtschaft chönd sitze. Wettet eu allne glich was für Wetter das mer hend e schöni Wiehancht und eze scho en guete Start is neue Jahr 2016 wünsche. Und wenn`d eus bi dere Glägehgeit bi eu allne für euri Unterstützig bedanke. Freuet eus jetzte scho uf alli Uftritt im neue Jahr und würet eus freue wemer au im nächste Jahr wieder am eint oder andere Ort dörfet atreffe !


16.Oktober 2015

Und scho simmer wieder im Herbscht glandet und gönd scho wieder gege s`Endi vom Jahr 2015 zue. Bevor das aber scho wieder de Vergangeheit aghört, simmer namal a de verschiedenschte Ort am Musig mache. De Afang macht am Samschtig 17.Oktober de Herbstmärt in Freiebach. Det schpilememer am Abig im Festzelt. E Wuche druf am 24.Oktober simmer denn a de Metzgete in Wädenswil. Au im November simmer unterwegs. Am 7.November in Fischenthal am Ländlerabig. Und am Wuchenend vom 19. - 21. November schpilemer zerscht am Dunnschtig im Dukes in Sihlbrugg, am Fritig am Turner-Chränzli in Samstagere und am Samschtig a de Chesslätä in Morschach. Im Dezember chönder eus na am Wiehnachtsmärt in Schöneberg und am Früehschoppe i de Risa Bar in Richterswil ghöre. Wiiteri Informatione z all dene Uftritt gfindet Ihr wie immer under de Site Agenda uf eusere Website. Wünschet eu allne e gueti Zyt und en schöne Herbscht und hoffet eu mal a eim vo eusne nächste Uftritt chönne z`begrüsse. Bis i dem Fall hoffentlich bald !


11.August 2015

So bevor de Summer langsam wieder am Endi zue gat, dörfemer na a de eint oder andere Chilbi go Musig mache. De Afang macht d`Chilbi in Samstagere am kommende Samschtig em 15.August dete schpilemer ab 21:00 i de Kafistube vom Männerchor Frohsinn. E Wuche druf am Sunntig em 23.August simmer in Wädenswil bi de Trubadix im Festzelt am spiele. Dete fangemer denn am 11:00 a. Um die glichi Zyt schpilemer denn am Sunntig 6.September im Skiclub-Zelt a de Chilbi in Oberrieden. Freuet eus uf eusi Chilbi Uftritt und würet eus freue wemer de eint oder ander vo eu würet gseh.

So das wer`s für de Moment. Wünschet eu na en schöne reschte vom Summer und hoffentlich bis bald wieder e mal !


23.Dezember 2014

Unglaublich aber scho wieder gat es Jahr das mal s` 2014 gege s`Endi zue. Mir bedanket eus darum bi allne wo eus au i dem Jahr unterstützt hend.

Mir freuet eus uf`s neue Jahr 2015 wo mir hend scho die verschiedenschte Termine hend chönne abmache. Die gfindet Ihr wie immer under de Site Agenda. Bevor aber das Jahr aber wieder de Vergangeheit aghört, schpilemer am Fritig 26.Dezember ab 21:00 Uhr na a de Autocrossbar in Hütten. Vilicht gsemer ja na de eint oder ander.

 

Mir haltet eu uf jede Fall uf em laufende und wünschet eu jetzt zerscht mal allne ganz schöni "Wiehnacht" und jetzt en guete Start is neue Jahr "2015" ! 


25.März 2014

 Erscht grad hämmer na Silveschter gfiiret und eus uf`s neue Jahr 2014 gfreut. Jetzt simmer scho zmitzt drin und wartet scho lang uf de Früehlig!

 

Mir sind guet is neue Jahr gstartet und händ näbet vil Uftritt i de Region au das Jahr a de Albisgüetli-Tagig vo de SVP in Zürich gschpilt. Ebefalls hemer dörfe in Arosa i de Tschüggehütte und in Dottikon bi Lenzburg im Kanton Aargau a de Fasnacht Musig mache. Es paar Impressione us Arosa gfintsch i eusere Bildergalerie.

Au für de Früehlig, de Summer und de Herbscht schtönd scho verschiedeni Uftritt uf em Programm. Schpilet au das Jahr im Juni am Einachserrenne in Schöneberg und im September a de GEWA in Wädenswil. Alli Uftritt gfintsch du selbschtverständlich immer under de Site Agenda uf dere Internetsite.

 

Mir haltet eu uf jede Fall uf em laufende und freuet eus jetzt scho eu am einte oder andere Uftritt wieder z`gseh...


1.Januar 2014

 Entli isch es sowiit, mir hend entlich e neui Internetsite. Ab sofort gintsch du uf www.raphaelfuchs.ch und www.ländlermusik.ch die neuschte Neuigkeite, Uftritt und was mer alles na so wüsse muess oder ebe au nöd !

Die Site wird laufend aktualisiert, so das Ihr immer uf em neuschte Stand sind. 

 

Mir freuet eus ufs neue Jahr 2014 und all die Uftritt womer scho hend chönne anäh das Jahr. Mir hend vil güebt und freuet eus eu allne euses alte sowie neue Repetoir chönne bald vor z schpile.

 

Under de Site Agenda gfindet Ihr alli aktuelle Uftritt, wür eus freue wemer de eint oder ander würet gseh.

 

Wünschet eu allne en guete Start is neue Jahr 2014 und hoffentlich bis bald !